Euver ’t Hoes
’t Hoes veur ’t Limburgs (’t Hoes) is hét kinnes- en ekspaertiese-centrum op ’t terrein van de Limburgse taal.
Hét kinnes- en ekspaertiese-centrum
In ’t Hoes kump al de kinnes euver de Limburgse taal same. Wie ’n sjpin in ’t wèb haet ’t Hoes kiek op e oetgebreid nètwerk binne ’t Limburgse taal-, kulturele, en maatsjappelik veldj. Ouch is ’t ’ne ieferige pleiter van de veurdeile van meertaligheid en ’t gebroek van de Limburgse taal in de ganse Limburgse gemeinsjap. ’t Hoes óntwikkelt, verzamelt en maak produkte toegankelik (veur ’t óngerwies) euver en in de Limburgse taal en det in samewirking mit deilgenote in de ganse ómgaeving.
Al ’t werk van ’t Hoes is gerich op waat ’t Limburgs taalveldj neudig haet en op dees meneer ’t Limburgs verbreije, verjónge, same optrèkke en professionalisere.
Missie en visie
’t Hoes veur ’t Limburgs is opgerich óm ’t Limburgs as sjtreektaal in Nederlands Limburg te verankere, ’t gebroek daovan te bevordere en de pesitie te versjtevige euveral in de samelaeving.
Coöperatie
’t Hoes veur ’t Limburgs is in 2023 begós mit ’n sjtuurgroep die besjteit oet vertaegewäördigers van de Limburgse taalorganisaties: Veldeke Limburg, Raod veur ’t Limburgs, Limbörgse Academie, Levende Talen Limburgs, de Vereniging Limburgse Dialect- en Naamkunde (VLDN), de Willy Dols Stichting en ’n vertaegewäördiging van de kienjeropvang. ’t Hoes zal in 2024 gaon funktionere wie e samewirkingsverbandj.