De Limburgse taol
De Limburgse taol in Nederlands Limburg is ’n erkinde regionaol taol bestaond oet ’n groete diversiteit aon dialekte mèt väöl euvereinkomste en typische eige kinmerke. ’t Hoes zèt ziech in um kinnes euver de Limburgse taol touwgaankelek te make.
Erkinning
In 1997 is ’t Limburgs erkind es regionaol taol oonder ’t Europees Handves veur regionaol taole of taole vaan minderhede. Heidoor kinne de provincie en de Limburgse gemeinte ’n eige beleid veur ’t Limburgs veure. Zoe maakde de provincie Limburg aofspraoke mèt ’t Ministerie vaan Binnelandse zake euver ’t behaajd vaan de Limburgse taol. Die aofspraoke zien vasgelag in ’t convenant Limburgs.
Spelling
De Limburgse taol is ’n echte spreektaol meh dao weurt ouch volop in ’t Limburgs gesjreve. Beuk en blogs, leedsjes en gediechte, sociaol media beriechte en appkes. Limburgs sjrieve is hartstikke gewoen! Wèlste dat volgens de spelling doen of dao gewoen mie euver wèlle wete, haw daan de vastgestèlde Spelling 2003 aon es basis. Dees spelling heet es veurdeil tot ze touwgepas kint weure op bekans alle Limburgse dialekte. De basisklaanke die ’t Limburgs riek is, zien in väöl Limburgse dialekte aonwezeg en kinne op dees meneer euveral ’tzelfde gesjreve weure. Dowload hei de complete Spelling 2003 of de spelling veur e specifiek dialek.
Limburgse woordebeuk
Download hei ’t actueel euverziech vaan fysieke en digitaol dialekwoordebeuk in Limburg.