Vacature Besjtuursleje Coöperatie Hoes veur ’t Limburgs

Wils se mitboewe aan de toekóms van de Limburgse taal? Dan zeuke v’r dich!
 
‘t Hoes veur ’t Limburgs (‘t Hoes) is hét kènnis- en expertisecentrum op ‘t gebied van de Limburgse taal. In ‘t Hoes kump alle kènnis euver de Limburgse taal same. Es sjpin in ‘t web haet ‘t Hoes zich op ‘n breid netwerk bènne ‘t Limburgse taal-, culturele en maatsjappelijke veldj en op de trends en ontwikkelinge bènne dat veldj. ‘t Hoes is ‘n actieve pleitbezörger veur meertaligheid en ‘t gebroek van de Limburgse taal in alle domiene van de Limburgse samelaeving. ‘t Hoes ontwikkelt, documenteert en publiceert materiale euver en in de Limburgse taal in samewirking mit partners in ‘t veldj en in lien mit weitensjappelijke bevènjinge.
 
Ózze missie: ‘t Limburgs in Nederlands Limburg es taal te behawte, ‘t gebroek d’rvan - zij ‘t receptief of productief - te bevordere en de positie te besjtendige in alle domiene van de samelaeving. Dènk hiebie aan educatie, kuns & cultuur, zörg & welzijn, digitalisering én meë. ‘t Hoes is veurtgekómme oet ‘n breije samewirking tösje Limburgse taal- en cultuurorganisaties en krig in 2025 häör definitieve vórm es coöperatie. Daorveur zeuke veer:

• ‘Ne secretaris

• ‘Ne penningmeister

• Twee algemein besjtuursleje

mit expertise in ein of meë van de volgende gebiede:

• Taalkunde | Academische achtergróndj in taalkunde of ‘n aanverwantje discipline.
• Financiën | Ervaring mit begreuëtinge en financieel beheer.
• Juridisch | Kènnis van wèt- en reigelgaeving, mit name op ‘t gebied van taalrechte.
• Educatie | Inzich in en ervaring mit ‘t óngerwiesveldj en kènjeropvang.
• Digitalisering | Kènnis van digitale ontwikkelinge en hun toepassing.
• Kuns en cultuur | Verbènjing mit de Limburgse culturele sector.
• Zörg en welzijn | Ervaring mit zörg- en welzijnsorganisaties.

Wat verwachte veer?

• Affiniteit mit ózze doelsjtèllinge;
• Beleidsmatig dènke;
• Besjtuurlijke sensitiviteit;
• Beheersing van ‘t Limburgs (tenminste in woord);
• Deilname aan besjtuurs- en lejevergaderinge;
• Tiedsinvestering van ca. 6-8 oer per maondj.

Secretaris

De secretaris is te kenmerke es ‘t geheuge van de coöperatie De secretaris:

• Is punctueel en proceduregerich;
• Haet ‘n goje pen;
• Haet besjtuurlijke sensitiviteit;
• Kènt good samewirke;
• Kènt good organisere en communicere;
• Kènt delegere. 

Penningmeister

De penningmeister is verantjwoordelijk veur ‘t algeheel financieel beleid van de coöperatie De penningmeister:

• Besjik euver financiële en bedriefseconomische vaardigheje;
• Is besjtuurlijk sensitief;
• Kènt good samewirke;
• Kènt good communicere;
• Kènt dudelijk informere. 

Wat beje veer?

• ‘n Unieke kans om bie te drage aan ‘t Limburgs taalbeleid;
• Samewirking mit ‘n gemotiveerd en deskundig bureau en besjtuur;
• Netwerkmeugelijkheje in o.a. educatie, cultuur, zörg en euverheid;
• ‘n Vergoeding passend bie de ómvang van de coöperatie.

Procedure

Geïnteresseerde kandidate waere verzoch hun motivatie en curriculum vitae op te sjikke. Gaef daobie aan welke specifieke expertise, kènnis en ervaring se mitbrunks en op welke meneer se ‘t besjtuur kèns aanvölle.

V’r zeen dien reactie gaer tegemoot véúr 1 april. De selectiegesjprekke vènje in de periode van 7 tot en mit 18 april in de aovendoere plaats. De veurdrach is gepland in waek 17 en de sjtart van ‘t nuje besjtuur is veurzeen op 1 mei 2025.

Interesse?

Sjik dien motivatie en cv nao sollicitatie@hoesveurtlimburgs.nl. Veur meë informatie num dan kóntak op mit Sandra Holtjer, kwartiermaker Hoes veur ‘t Limburgs (06-29269944).